كيفاش يمكن لك تشد شهادة أو ديبلوم معترف به عالميا بالمجان و ممكن أنك تخدم به !!

شحال من واحد فهاد الصيف كايضيع وقتو فوالو 🤔
في حين أنك ممكن تستاغلو فحاجة لي غاتنفعك بزاف فحياتك و فمستقبلك 😉👌
كمثال لهاد الشواهد لي خديت انا غير فالانترنيت و هما شواهد و ديبلومات لي معترف بهم عالميا و خديتهم فاابوور
و لي غادي ينفعوك فمسيرتك الدراسية و المهنية 🏅
و كيفما شديتهم أنا فممكن نتا ولا نتي تحصلو عليهم.. 😉

نخليكم مع التفاصيل ف 👇

#كيفاش_يمكن_لك_تشد_شهادة_أو_ديبلوم_معترف_به_عالميا_و_ممكن_أنك_تخدم_به 📜

اليومية ديال هاد النهار غاتكون الحصول على شهادات 📜 و ديبلومات لي الأغلبية منهم مجانية فااابور ..

⚪ دبا ايلا بغيت نشد هاد الديبلومات اش غايخصني ؟؟

☑ أول حاجة خا تكون عندك نتا رغبة بأنك باغي تقرى
ثاني حاجة غايخصك بيسي 💻 + كونكسيون 📶 باش تتبع مع الدروس...الخ

⚪ هاني ا معاذ عندي بيسي و عندي كونكسيون و باغي نقرى.. ولكن ماعارفش فين ولا فاشمن بلاصة كايقراو باش نشد هاد ديبلومات ؟؟ 🤔🤔

☑ القراية كاتكون اونلاين و كاينين مواقع متخصصة لهاد الدراسة كايتسماو ل MOOC كاتكون عندهم امتيازات أنك تقرى و فاش كاتسالي كاتدوز امتحان ✍.. و ملي كاتنجح كايعطيوك شهادة بالاسم ديالك بلي راك نجحتي فالمجال لي قريتي فيه 😍

⚪ اييه و اشنهما هاد المواقع لي كايعطيوك هاد الامتيازات🤔 ؟؟

☑ بالنسبة لتجربتي الشخصية فخديت ديبلومات كيفما كايبانو فالصور
نعرفليكم كل واحد منهم 📑

🔹 اInbound Marketing Certification : أو بالعربية التسويق الداخلي .. هذا متعلق بالناس لي باغيين يتعمقو فالتسويق الالكتروني .. هاد ديبلوم كاتقراه باللغة الانجليزية .. الشرح لي فيه كايكون بسيط و جد ساهل كايخصك غير تتبع مزيان و تفهم
امتحان مدته ⏰ 70 دقيقة .. باش تنجح فيه خاصك تجيب 70 من أصل 100 .📝
ايلا كنتي مهتم بهاد الشهادة و بالدورة فهاهو الرابط ديال التسجبل تاعها :
اظغط هنا

🔹 لCertification Google Pour Les Pros : شركة كوكل و من لا يعرفها .. هاد ديبلوم كنت خديتو مؤخرا و كان من الشهادات المفضلين 👌عندي حيت استافدت منو بزااف و فيه معلومات قيمة و كثيرة..
التخصص تاع هاد ديبلوم هو التسويق الالكتروني..

كوكل بشراكة مع IAB Europe.. قدمات هاد الدورة للناس لي باغيين يتعرفو و يخدمو فلويب 🖥 و كيفاش ممكن يسوقو للمنتوج أو الموقع ديالهم بطريقة استراتيجية و كيفاش يجدبو زبائن جداد.. 📈
الدورة فيها 89 درس + 23 شارة 🛡

باش تاخد الشهادة ديالك كايخصك تسالي دوك 89 درس و لي غايفتحو لك 23 شارة و من موراها كايمكن لك تسحب شهادة معتمدة و معترف بها من عند شركة كوكل. 🗞
الدورة يمكن لك تقراها باللغة الانجليزية و حتى الفرنسية.. اما اللغة العربية ماعرفتش

لي مهتم بالدورة تاع Google فها هو الرابط تاع التسجيل ديالها :
اظغط هنا

🔹 المهارات الأساسية للإسعافات الأولية 🔰🚑 من موقع إدراك
ادراك هي منصة عربية عندها حتى هي نفس الامتياز و لي كاتقرى فيها و فاش كاتسالي شي مساق كاتدوز امتحان و فاش كاتنجح كاتاخد شهادة ممنوحة من عندهم 🗞

هاد الشهادة تاع الاسعافات نفعاتني 😃 و صححاتليا بزاف دالافكار لي شائعة عندنا و لي كنت كانعتابرها صحيحة مي فالواقع راه طريقة خاطئة.. ☺

⚠ هادي شهادة كانصح بها أي واحد سواء كبير ولا صغير يقراها حيت بدون ديك الشهادة فراك غاتستافد كيفاش أنك تدير اسعافات لشخص معين ⛑ سواء واحد من عائلتك ولا أي شخص و تعاونو .. هاد الاسعافات كان خاص ضروري يقريوها لنا فالمنهج التعليمي حيت كايتعتابر من الضروريات و لكن الغالب الله 😕.. لمهم هاهي فرصة
لي باغي يتعلم و يفيد راسو أولا ثم يفيد الآخر 😁

الرابط ديال مساق الاسعافات الأولية :
اظغط هنا

🔹 شهادة التسويق الالكتروني . حتى هو من موقع ادراك
هاد المساق كايشرح لك فيه كيفاش يمكن لك تسوق منتوج أو شركة أو مشروع 🕵...الخ في مواقع التواصل الاجتماعي 📲
و كايبينلك الأهمية ديال هاد التسويق و كيفاش تستعملو بشكل جيد 📊

فصراحة هاد المساق استافدت منو و لكن ماشي بزااف حيت كان الأغلبية لي تشرح كنت أنا عارفو .. بالنسبة ليا مانفعنيش بزاف و لكن يمكن ينفعك نتا ولا ينفع شي حد آخر لي ماعارفش التسويق الالكتروني.. ☺

رابط المساق هو :
اظغط هنا

🔹 كاين ديبلوم آخر و لكن مزال ماوصلنيش باش نوريهلكم.. 📤
هاد الديبلوم خديتو من موقع ALISON لي مشهور
فاش غايوصلني و غانهدر عليه بشكل مفصل 😉

هادو لي شرحت لفوق هما من تجربتي الشخصية .. 😁
دبا غاندوي لكم على المواقع 👇 لي ممكن تشد فيهم شهادات من غير هادو لي قلت لكم لفوق :
كاين موقع #رواق
باللغة العربية AR حتى هو كايشبه لإدراك

ها الرابط ديالو لي بغاه :
www.rwaq.org

كاين موقع #كورسيرا
باللغة الانجليزية EN .. فيه تقريبا كاع المجالات لي بغيتي و تقدر تقرا و تشد شهادة
الرابط تاع الموقع :
www.coursera.org

موقع #EDx
حتى هو باللغة الانجليزية EN .. و فيه كاع المجالات لي باغي تقرى
رابط ديالو :
www.edx.org

و كاااين بزاااف و لكن لي معروفين هما لي كتبتلكم فهاد اليومية.. و حاول نشرحهم بالتفصيل 📝

⚫ واحد الحاجة غاتكونو لاحظتوها هي أن الاغلبية تاع الشواهد لي خديتهم كانو فالمجال الالكتروني و فالتسويق.. ااه حيت هاداك هو الدومين لي كانبغي 😍😁 و لي كانرتاح فيه و كايعجبني نقرى عليه..
فحتى نتا دخل لهاد المواقع و قلب على الدومين لي نتا عاجبك 😍 و عارف راسك غاتعطي فيه.. دير الهدف لول هو تثقف راسك و تاخد اكبر عدد ممكن من المعلومات و من موراها راه الشهادة 🎖🥇 غاتجيك و غاتحصل عليها.. 😉

⚫ اااه و واحد الإضافة اخرى هي أن هاد ديبلومات ممكن أنك تخدم بهم 👔 و تزيدهم فCV ديالك باش تضيف ميزة لك. ايلا كان غرضك تخدم بهم فراه غادي ينفعوك فسوق الشغل.

🔘 و فالأخيرايلا كان عندك شي تساؤل ولا شي استفسار 🤔 بخصوص هاد المواقع ولا أي حاجة متعلقة بهاد الموضوع.. مرحبا خلي كومنتير 💬 فيه استفسارك ولا السؤال ديالك و نجاوبك عليه..